ചരിത്രങ്ങള്‍ ഉണ്ടാവുന്നതും ഉണ്ടാക്കപ്പെടുന്നതുമാണ്. റമദാനില്‍ ഓണം വന്നു ചേര്‍ന്നത് ഉണ്ടായ ചരിത്രവും,ആ ഓണം സ്നേഹത്തിന്റെയും സൌഹാര്‍ദത്തിന്റെയും നോമ്പുതുറയാക്കിയത് ഉണ്ടാക്കിയ ചരിത്രവുമാണ്. ചേന്ദമംഗല്ലൂര്‍ ഗ്രാമത്തിന്റെ വരും നാളുകളിലെഴുതാനിരിക്കുന്ന ചരിത്ര കുറിപ്പുകളില്‍ ഈ ഉണ്ടാകലും ഉണ്ടാക്കലും ഇടം നേടാതിരിക്കില്ല.
രണ്ടായിരത്തി എട്ടിലെ റമദാനില്‍ ഓണത്തെ വരവേറ്റത് ചേന്ദമംഗല്ലൂര്‍കാരനായ സുനില്‍ കുമാര്‍ ചക്കിട്ടക്കണ്ടി തന്റെ ഗൃഹാങ്കണത്തിലൊരുക്കിയ ഓണസദ്യ ഒരു നോമ്പു തുറയായിട്ടായിരുന്നു. അന്നു തന്നെ സുനില്‍ കുമാറിന്റെയും കൂട്ടുകാരുടെയും വല്ലാത്തൊരു പൂതിയായിരുന്നു ഇത്തിരി വിപുലമായ തോതില്‍ ഒരു ഓണസദ്യ 'കം' നോമ്പുതുറ.

സുനില്‍ കുമാര്‍ നോമ്പുതുറയൊരുക്കുന്നതിന് ദിവസങ്ങള്‍ക്ക് മുമ്പെ, മലയാളത്തിലെ ഒരു പ്രമുഖ വാരിക ചേന്ദമംഗല്ലൂര്‍ ഗ്രാമത്തെ തീവ്രവാദത്തിന്റെയും ഭീകരവാദത്തിന്റെയും കേന്ദ്രമാക്കി ചിത്രീകരിക്കാന്‍ വൃഥാ ശ്രമിച്ചത് വെറുതെയെങ്കിലും ഇപ്പോഴോര്‍ത്തുപോവുകയാണ്. ജമാഅത്തെ ഇസ്ലാമി ചേന്ദമംഗല്ലൂര്‍ സെന്‍ട്രല്‍ ഹല്‍ഖയുടെ നേതൃത്വത്തില്‍ ഗ്രാമത്തിലെ അമുസ്ലിം സഹോദരങ്ങളെ പ്രത്യേകം ക്ഷണിച്ച് നടത്തി വരുന്ന നോമ്പുതുറ കൂടിയാവുമ്പോള്‍ ഈ ഗ്രാമത്തിലെ തീവ്രവാദ ഭീകരവാദങ്ങള്‍ പൂര്‍ത്തിയായി.
മലയാളമേ, നിന്റെ ദുര്‍ഗതി!!!
ചേന്ദമംഗല്ലൂരില്‍ ഹിന്ദുവിനും മുസല്‍മാനും തമ്മിലുള്ളത് സ്നേഹമാണെന്ന് നേരത്തെ തന്നെ പലവുരു ലോകം കേള്‍ക്കുമാറുറക്കെ പറയപ്പെട്ടതാണ്. പക്ഷേ, അന്തിപ്പകലുകളെ 'ആമ്പ്രം മറിക്കാന്‍' ശ്രമിക്കുന്നവര്‍ക്ക് വഴിയെ പോകുന്നവരൊക്കെ തീവ്രവാദിയും ഭീകരവാദിയുമാണ്. തോക്കേന്തി പാഞ്ഞുവരുന്ന ഭരണകൂടത്തിന് മുന്നില്‍ വെടിയേറ്റ് പിടയുന്ന പ്രജകളൊക്കെ തീവ്രവാദിയും പാക് ചാരന്മാരുമായി മാറുന്നു. അതിന് കൂട്ട് നില്‍ക്കാന്‍ മുത്തശ്ശി-മുത്തശ്ശന്മാരൊക്കെ സകല വയസ്സത്തരങ്ങളും പ്രകടിപ്പിച്ച് മുന്നിലുണ്ട്.
അക്ഷരമലയാളമേ, നിന്റെ ദുര്‍ഗതി!!!
നോമ്പുകാലത്ത് വിരുന്ന് വന്ന ഓണം നോമ്പുതുറയിലൂടെ പലയിടങ്ങളിലും ആഘോഷിക്കപ്പെട്ടു. പക്ഷേ, ഒരു ഗ്രാമത്തിലെ മുഴുവന്‍ ഹിന്ദു സഹോദരങ്ങളും ഒത്തു ചേര്‍ന്ന് തങ്ങളുടെ സഹോദരങ്ങളായ മുസ്ലിംകളെ നോമ്പു തുറപ്പിച്ചു എന്നതാണ് ചേന്ദമംഗല്ലൂരിലെ 'ഓണത്തുറ'യെ വ്യത്യസ്തമാക്കുന്നത്. ഇവിടുത്തെ സൌഹൃദാന്തരീക്ഷം വിവരണാതീതമാണ്. ജനനം, മരണം, കല്യാണം, വെള്ളപ്പൊക്കം, വീട് നിര്‍മാണം, ആഘോഷങ്ങള്‍... ജീവിതത്തിന്റെ വിവിധ മേഖലകളിലിവര്‍ക്ക് ഒത്തു ചേര്‍ന്നു കൂടാത്തതായിട്ടൊന്നുമില്ല. ചില അമുസ്ലിം സഹോദരങ്ങള്‍ തങ്ങള്‍ മരിച്ചാല്‍ കുളിപ്പിക്കാന്‍ കുഴിയിലിറക്കാന്‍ വേണ്‍ടി നേരത്തെ പറഞ്ഞു വെക്കുന്നത് ചില മുസ്ലിം സഹോദരങ്ങളുടെ പേരാണ്. അത്തരം സന്ദര്‍ഭങ്ങളില്‍ ഓടിയെത്തുന്ന മുസ്ലിം സഹോദരന് മരണവീട്ടുകാര്‍ എല്ലാ ഒരുക്കങ്ങളും ചെയ്തു കൊടുക്കുന്നു. ഈ സ്നേഹം കൊണ്ട് ചേന്ദമംഗല്ലൂരുകാര്‍ വേര്‍പാടിന്റെ വേദന പോലും ഇല്ലാതാക്കാന്‍ ശ്രമിക്കുന്നു.
ഇനിയുള്ള കാലത്തേക്ക് കൂടി പങ്ക് വെക്കാനായി സ്നേഹം മനസ്സില്‍ നിറച്ച് നോമ്പ് തുറന്ന് തല്‍ക്കാലം പിരിഞ്ഞ ചേന്ദമംഗല്ലൂരിലെ സഹോദര സമുദായങ്ങള്‍ കൊണ്ടും കൊടുത്തും ചിരിച്ചും കളിച്ചും തീര്‍ച്ചയായും രാജ്യത്തിന് മാതൃകയായി മാറും. ഈ ചരിത്രങ്ങള്‍ വായിക്കപ്പെടാതിരിക്കുകയുമില്ല.