ബോട്ടില്‍ നിന്ന് വീണ്ടും തുടരുന്നു....(16/7/2009)

  അനിശ്ചിതാവസ്ഥക്ക് വിരാമമിട്ട് വെളളം കയറുന്നു. ഇന്ന് ഉച്ചക്ക് 12 മുതല്‍ 12.30 വരെ വെളളം നിലച്ച അവസ്ഥയിലായിരുന്നു. ഇപ്പോള്‍ വീണ്ടും വെളളം പൊങ്ങുന്നുണ്ട്. ഏവരും കാത്തിരുന്ന തെയ്യംത്തുകടവ് റേഡിലെ വെളളം പുല്‍പറമ്പിലെ റോഡിലെ വെളളവുമായി ഇടമുറിഞ്ഞു. കളത്തിങ്ങല്‍ വീടിനുമുന്നില്‍ അരയ്കുമീതെ വെളളം പൊന്തിയിട്ടുണ്ട്. പുല്‍പറമ്പ് തീര്‍ത്തും ഒറ്റപ്പെട്ട അവസ്ഥയിലായതിനാല്‍ പുല്‍പറമ്പിലെ ഏറ്റവും പുതിയ വിവരങ്ങള്‍ ലഭ്യമായിട്ടില്ല. എങ്കിലും ഒന്ന് തീര്‍ത്തു പറയാം അവര്‍ സന്തോഷിക്കുക തന്നെയാണ്. ഇന്ന് രാവിലെ 10 ന് നടക്കേണ്ട ബോട്ട് റൈസിംഗ് മത്സരം, വൈകുന്നേരം 4 ന് മാറ്റിയതായി സംഘാടക സമിതിക്കുവേണ്ടി സി.ടി.അദീബ് അറിയിച്ചു.

'കൊങ്ങംബൈളളം' ഇങ്ങെത്തുമ്പോള്‍ മാത്രമാണ് ബോട്ടുകളെക്കുറിച്ച് ഉടമസ്ഥര്‍ ആലോചിക്കുക. പലരും ഉപയോഗിച്ച് അശ്രദ്ധമായി വെക്കുന്നതിനാലും പലരുടെയും ബോട്ട് എലി കരണ്ടതിനാലും, വലിയ ദ്വാരങ്ങല്‍ വീണ് ഉപയോഗ ശുന്യമാണ്. ഇന്ന് ബോട്ട് റൈസിംഗ് മത്സരത്തില്‍ എങ്ങനെയെങ്കിലും പങ്കെടുക്കുക എന്ന വാശിയില്‍ ബോട്ടുടമകള്‍ ബോട്ടുമായി പഞ്ചര്‍കടകള്‍ക്കുമുന്നില്‍ ക്യൂവിലാണ്. ഇവരുടെ ബോട്ടുകള്‍ കൂടി ഇറങ്ങുന്ന പക്ഷം കൂടുതല്‍ പേര്‍ മത്സരത്തിനുണ്ടാവുമെന്ന് കരുതുന്നു. രാവിലെ മത്സരം കാണാന്‍ വന്ന സ്ത്രീകളടക്കമുളളവര്‍ മത്സരം നടക്കാത്തതിനാല്‍ നിരാശരായി മടങ്ങി. വൈകുന്നേരം കൂടുതല്‍ കാണികളെയും മത്സരാര്‍ത്ഥികളെയും ഉള്‍കൊളളിച്ചുകൊണ്ട് മത്സരം നടക്കുമെന്നു തന്നെയാണ് പ്രതീക്ഷിക്കുന്നത്. ഇപ്പോള്‍ തന്നെ പലരും പരിശീലനത്തിലാണ്.

വീടുകള്‍ ഒഴിഞ്ഞുതുടങ്ങാനുളള തയ്യാറെടുപ്പില്‍....!!!
വെളളം തേവര്‍മണ്ണിന്റെ മുറ്റത്തേക്ക് എത്തിനോക്കിത്തുടങ്ങി. ‘വയലോരം’ പുഴയോരമാവുമെന്ന കണക്കുക്കൂട്ടലില്‍ കെ.ടി. നജീബ്ക്ക തമിഴ് തൊഴിലാളികളെ നേരത്തെതന്നെ ബുക്ക് ചെയ്തു. തന്റെ മകന്‍ ഫര്‍ഹാന്റ ഫൈബര്‍ തോണിയിലായിരിക്കും ഇനിയുളള ദിനരാത്രങ്ങളെന്ന് അദ്ദേഹം ആശങ്കപ്പെടുന്നു. കരണ്ട് പോയത് നാട്ടുകാരെ അല്‍പം പ്രയാസത്തിലാക്കുന്നുണ്ടെങ്കിലും. കൊങ്ങം ബെളളത്തിന്റെ ആവേശത്തില്‍ തന്നെയാണ് നാട്ടുകാര്‍.

cmronweb നു വേണ്ടി പുല്‍പറമ്പില്‍ മറ്റൊരു ബോട്ടില്‍ നിന്നും മാഹിര്‍
(സമയം 2.30)
Photos: Swalih & Zuhair

ഹമ്പിന്റെ മുകളില്‍ നിന്നും മാഹിര്‍(17/7/2009)

  ഒടുവില്‍ 'കൊങ്ങംബെളളം' യാഥാര്‍ത്ഥ്യമായി. രണ്ട് ദിവസമായി തുടരുന്ന വെളളപ്പൊക്കം ഇന്നത്തോടെ അതിന്റെ രൌദ്രഭാവം പൂണ്ടിരിക്കുന്നു. വളരെ സാവാധാനം ഏറിയേറി വന്ന വെളളം ചേന്ദമംഗല്ലൂര്‍ - മുക്കം റോഡിനെ കീഴടക്കി. ഇപ്പോള്‍ പി.കെ. റസാഖിന്റെ വീടിനു മുന്നില്‍ എത്തിയിരിക്കുന്നു. പലരും വാഹനങ്ങള്‍ കയറ്റിവെച്ചത് അദ്ദേഹത്തിന്റെ വീട്ടിലായിരുന്നു. രാവിലെത്തതന്നെ എല്ലാവരും വാഹനങ്ങള്‍ പാലിയിലേക്ക് മാറ്റി. പുല്‍പ്പറമ്പിലെ പലഭാഗങ്ങളും ചെറിയ ചെറിയ തുരുത്തുകളായി മാറി. കളത്തിങ്ങല്‍, തേക്കും പാലിയില്‍, അമ്പലക്കണ്ടി ഭാഗങ്ങള്‍ തീര്‍ത്തും ഒറ്റപ്പെട്ടു. അവശ്യ സാധനങ്ങള്‍ വാങ്ങന്‍ ചേന്ദമംഗല്ലൂര്‍ അങ്ങാടിയിലെക്ക് തോണിയിലും ബോട്ടിലുമായി വരുന്നു. കറന്റില്ലാത്തതിനാല്‍ കൂടരഞ്ഞി പള്ളിപ്പെരുന്നാളിന് കത്തിക്കുന്നതിനേക്കാള്‍ ഇത്തവണ മെഴുകുതിരിക്ക് കൂടുതല്‍ കച്ചവടം നടന്നെന്ന് പനങ്ങോടന്‍ സ്റോര്‍ ഉടമ ഇസ്തിഖാര്‍ സാക്ഷ്യപ്പെടുത്തുന്നു. തേവര്‍ മണ്ണുകാര്‍ വീട്ടില്‍ വെള്ളം കേറുമെന്ന ഭീതിയിലാണ്. ഇപ്പോള്‍ അവരുടെ കോലായിലെത്തിക്കഴിഞ്ഞു. സാവധാനം കയറിയവെള്ളം ഇറങ്ങാന്‍ സമയമെടുക്കുമെന്ന് പഴമക്കാര്‍ അനുഭത്തിന്റെ വെളിച്ചത്തില്‍ ആണയിടുന്നു. ഇപ്പോള്‍ വെള്ളം നമ്പുതൊടിക്കു മുന്‍പില്‍ എത്തിയിരിക്കുന്നു (സമയം 11.30)
പുലര്‍ച്ചെ വെള്ളം അല്‍പം ഇറക്കം തുടങ്ങിയെങ്കിലും 6 മണിയോട് കൂടി വീണ്ടും കയറ്റമായി. കാരണവന്‍മാര്‍ പറയുന്നു "ചാലിയാര്‍ തിക്കുകയാണെന്ന് ''. ചാലിയാര്‍ വെള്ളം കൊണ്ടാണോ ഊര കൊണ്ടാണോ തിക്കുന്നതെന്ന് അറിയാതെ കുട്ടികളും പറയുന്നു "ചാലിയാര്‍ തിക്കുന്നു ''.
മിനി പഞ്ചായബുകാര്‍ക്ക് അല്‍പം ആശ്വാസം; ഇത്തവണ വെള്ളം റോഡിന് സമാന്തരമായി നില്‍ക്കന്നു. പഞ്ചാബുകാര്‍ ആഹ്ളാദ തിമിര്‍പ്പിലാണ് . റോഡിലൂടെ പോകുന്ന എല്ലാ യുവാക്കളെയും അവര്‍ വെള്ളത്തിലേക്ക് വലിച്ചെറിഞ്ഞു അകൂട്ടത്തില്‍ www.cmronweb.com ന്റെ പ്രവര്‍ത്തകരെയും വെറുതെ വിട്ടില്ല. ശ്രീനിവാസന്‍ പറഞ്ഞത് പോലെ ക്യാമറയും കൂടെ ചാടാത്തത് കൊണ്ട് ഫോട്ടോകള്‍ സൈറ്റിലേക്കെത്തിക്കാന്‍ കഴിഞ്ഞു.
രാവിലെ മുതല്‍ അങ്ങാടിയിലെ ഇറച്ചിക്കടക്ക് മുന്നില്‍ നീണ്ട ക്യൂവാണ്. കൊങ്ങം ബെള്ളവും വെള്ളിയാഴ്ചയും ഒരുമിച്ചു വന്നാല്‍ ചേന്ദമംഗലൂര്‍ക്കാര്‍ക്ക് ഇറച്ചിതിന്നണം. പ്രമുഖ കോളമിസ്റ് എ.എം. ഷിനാസിന്റെതാണ് ഈ കമന്റ്.
മീന്‍ പിടുത്തവും തകൃതിയായി നടക്കുന്നു. തണ്ടാടിയിട്ടും ചൂണ്ടയിട്ടും മീന്‍പിടുത്തം ജോര്‍. വെള്ളക്കയറ്റം ഇപ്പോള്‍ തല്‍ക്കാലം നിലച്ചിട്ടുണ്ട്.